أخر الأخبار:

زواج أبسط من التقاليد

الأربعاء, 03 فبراير 2016 09:16 //

ياسمين مدكور تكتب :

فيه ناس استغربت أو زعلت مني لإني معزمتهاش علي جوازي، الحقيقة هي إننا معزمناش حد عشان معملناش فرح، كل اللي عملناه اننا روحنا للمأذون كتبنا الكتاب وبعدها روحنا معاد شغل سوا و بعدها اتعشينا في مطعم بقالنا كتير عاوزين نجربه. في هدوء وببساطة وكان نفسي في ده طول حياتي، ولحد دلوقتي مش قادرة أصدق إن ده حصل فعلًا. وان الجواز بالبساطة دي بعيد عن أي تعقيدات ترتيبات فرح وزفة ومعازيم وطقم صيني وطقم 17 حلة وطقم الخشاف والجيلي اللي هيتحط في النيش.

وطنطات اللي معرفهمش وجايين يجاملوا والناس اللي جايه تؤدي واجب اجتماعي في أهم يوم في حياتي، بالشكل اللي مفرقش كتير عن العزا. وبهرجة كتير وزحمة ودوشة، عشان بس الناس تعرف ان فيه اتنين اتجوزوا، مع انهم برضه عرفوا ده لما عملنا married علي الفيسبوك.

العادات والتقاليد لو بتسهل الحياة أهلا بيها، بعد ما نتأكد انها فعلا بتسهلها، لكن لو بتصعب الدنيا وتعقدها يبقي بلاش منها، انت بتتجوز عشان ترتاح قبل ما يكون عشان تتبسط وبتطور شكل حياتك وتختار حد تشاركوا بعض حياتكم، بينكم قيم مشتركة وأفكار متشابهة. لا شبكة بتحمي واحدة من ان جوزها يمنع عنها انها تشتغل أو يديلها ملاليم كل شهر عن قصد لإذلالها ولا شقة بمليون جنيه بتضمن لواحد انه يعيش سعيد ومرتاح.

                                

لا الفرح اللي بيتصرف عليه قد كده ويحضره ناس جايه تقول رأيها في الاتنين اللي بيبدأوا حياتهم، وهما أصلا ميعرفوش عنهم غير الساعتين دول، ولا شيء طبيعي ان اتنين يبدأوا حياتهم بإنهم يبسطوا الناس!

الفرح والفستان والكوشة والزفة والشبكة والمعازيم والافلام دي كللللللها عظيمة لو هي دي اللي هتسعدك بجد، لكن طول ما انت بتعملها عشان حد تاني يبقي مبسوط وانت تبقى متكدر يبقى ملهاش أي لازمة. وتبقي بتخسر نفسك.

المظاهر عمرها ما كانت بتعمر بيوت، ولا عمرها بتسعد البيوت اللي بتعمرها. والخوف من كلام الناس وهيقولوا إيه وهياكلوا وشنا وإزاي منعزمش طنط فلانة والناس دي هتيجي تاكل فين ومنين وإزاي وكل الكلام ده لو بتعملوه تحت ضغط الناس وكلام الناس واللي اهاليكم عاوزينه وعشان العرف والناس والمجتمع، خليكم بس واضحين إن ده بتعملوه عشان ده. لو ده بتعملوه عشان ده اللي بيسعدكم انتوا وهو ده اللي عاوزينه فعلًا اعملوه عشان ده اللي هيبسطكم. لكن متعملش حاجة عشان تبسط حد تاني غيرك، ودي مش أنانية، دي حياتك اللي بتبدأها ومن حقك تبدأها بالشكل اللي يريحك. وحتي لو بتعمل ده عشان تبسط حد تاني خليك فاكر ان ده ميكدركش انت، وتبقي واعي لإنك مبتعملش ده عشان مبسوط بيه إلا لو مبسوط بيه.

في الاخر دي حياتك، واختياراتك من أول طقم المعالق اللي هتاكلوا بيه لمدة 25 سنه أو أكتر لحد الشخص اللي انت اختارته يشارك حياتك.

أهالينا شالوا لنا أطقم حلل وكاسات وبطاطين، وممكن جدا ينسوا في وسط كل ده يدوروا علي سعادتنا وسعادتهم، لإن الجواز مش طقم حلل، ولا فرح، ولا أوضة نوم مينفعش تقل عن 30 40 ألف، كل دي حاجات الناس والمجتمع حطها علي الجواز وبسببها بقي الجواز صعب، ومؤجل وناس بتتجوز وهي فوق ال 35 سنة عشان معندهاش تدفع كل ده، واللي ربنا كرمه ومعاه وبيتجوز بيبقي فاكر ان هو ده الجواز، أول حاجة بتيجي في بال أي حد عن الجواز، شقة وشبكة ومهر ومؤخر، السكينة والمودة والحب والتفاهم مش أول حاجة هتيجي في بالنا عشان هو ده اللي اتعلمناه، والجواز اتربط عندنا بالعبء والمسؤلية المالية والمادية، من غير ما يبقي فيه مساحة أكبر من كده للأهم للمسؤلية النفسية والمعنوية وان انت بتدور علي حد تسنده ويسندك وتبقوا فاهمين بعض وبتتكلموا لغة واحدة.

   

الاهم اللي هو ملوش دعوه بفلوس، مالوش دعوة بمظاهر، ولا مرتبط بكلام الناس. الاهم هتختار الشخص ده علي أساس ايه، وايه اللي انت عاوزه من العلاقه دي وايه اللي هو عاوزه، انت محتاج ايه وهو يقدر يقدم ايه، تقدر تديله ايه، وايه اللي ممكن تاخدوا وقت علي ما تشتغلوا عليه سوا، فاهمين بعض وبتراعوا بعض؟ ولا فيه شخص منكم هو اللي مقوم العلاقة دي؟ عارفين حقوقكم كلها؟ بره القايمة والمؤخر والشروط اللي عاوزين تزودوها في العقد؟ عارفين ان من حق كل واحد فيكم ان العلاقه دي متبقاش مصدر أذى ليه؟ إن من حقك رغباتك ومشاعرك واهتماماتك وافكارك وآراءك وتوجهاتك وهويتك تحترم، حتي لو فيه حاجات مش متفقين فيها؟ إن من حقك تبقي الشخص اللي انت عليه وتتمسك بقيمك ومبادءك عشان متخسرش احترامك لنفسك؟ ان اهدافك وحياتك وشبكة علاقاتك واصحابك وحياتك الاجتماعية والعملية تأثير الجواز عليها مينفعش يبقي بالسلب حتي لو وقتك بقي أقل لكل ده؟

ان من حقك تبقي مرتاح في العلاقة دي تقدر تتكلم عن مخاوفك وافكارك من غير ما تحس انك متهم أو مضطر تبرر وتدافع أو ان الطرف التاني هيحكم عليك؟

ان انتوا الاتنين مش واحد، انتوا الاتنين كيانين مستقلين، اختارتوا تشاركوا بعض حياتكم عشان تبقوا أسعد وأحسن وتساعدوا بعض.

ان انتوا الاتنين مسؤولين عن حياتكم سوا مسؤولية مشتركة، ان الحياة بينكم بتتبني علي الثقة، ودي مبنديهاش ببلاش، دي بتجربها وبتكتشفها وبتديها جزء ورا جزء عشان تقدر تتسند علي الشخص ده؟

ان من حقك ان الشخص اللي بترتبط بيه (راجل أو ست) يبقي أمانك وحمايتك والشخص اللي بتاخد منه الأمان والطمأنينة لما أي حاجه تتلخبط في حياتك.

البساطة أريح كتير، وفيه حاجات كتير أهم من حاجات، متخليش حد يلهيك عن الاهم بالمظاهر اللي بتزول بانتهاءها، فكر في الأهم اللي باقيلك، فكري في حقوقك في علاقتك دي زي ما بتفكري في كام طقم كاسات هتجيبيه، وفكري في ليه اختارتي الشخص ده وازاي هتقدري تساعديه وتسعديه زي بالظبط ما بتفكري في طقم الحلل التلاتين قطعة، في الاخر الكاسات والحلل مهمين، بس هيتغيروا وممكن تجيبي غيرهم ولو مش موجودين في اول جوازكم هييجوا بعدين، لكن الحاجات التانية دي اللي بتبني عليها أهم علاقة في حياتك.

فكر في ايه اللي تقدر تقدمه وازاي هتقدر تحتوي بيت واسرة قبل ما تفكر هي بتلبس ايه وازاي وهتشتغل ولا لأ وٱهلها عاوزين كام مهر وشبكة....الخ.

الحياة أكبر من التفاصيل دي، وأبسط من كل التعقيدات دي، وفكر في سعادتك وراحتك لإن دي حياتك وكل قرار بتاخده فيها بتتحمل عواقبه لوحدك، أخيرًا شكرًا لكل اللي بارك بأي شكل وأي طريقة، عقبالكم وربنا يسعدكم وتلاقوا الشريك المناسب ويوفقكم.